Aracan
50101
50401
störtebeker und gödeke michael
de röveden beide to gliken deel
to water und nicht to lande
bet dat it got vam hemmel vordrot
des mosten se liden grot schande
de heren van hamborch togen ut
se gingen to segel al mid der flut
al na dem nigen werke
vor nebel se kunden nichtes seen
so duster weren de swerke
de swerke braken up de wulken worden klar
de heren van hamborch gingen to segel aldar
groten pris se wolden erwerven
störtebeker und gödeke michael
de mosten darumme sterven
se hadden enen holk mit win genomen
dar weren se met up de weser gekomen
dem kopmann dar to leide
se wolden darmet in vlanderen sin
se mosten noch darvan scheiden
höret up gi gesellen drinket nu nich me
dar lopen dre schepe in jener se
us gruwet vor der hamborger knechten
komen us de van hamborch an der bort
mit en so möte wi vechten
se brachten de bussen an de bort
to allen schoten gingen se los
do hort men de bussen klingen
do sach men so mennigen finen helt
sin leven tom ende bringen
se slogen sik dre dach und ok dre nacht
hamborch di was een boses bedacht
al to dersülvigen stunde
dat uns is lang tovorn gesecht
des kome wi nu to funde
de bunte ko ut vlanderen quam
so balde se dat gerücht vornam
mit eren starken hörnen
se ging brusen al dor de wilde see
den holk wolt se vorstören
se lepen em sin vorkastel entwe
truwn sprak sik gödeke michael
de tid de is nu komen
dat we möten vechten um user beider lif
dat mach uns schaden edder vromen
störtebeker sprak sik alsobald
gi heren van hamborch dot uns nene walt
we wille iu dat gud upgeven
wilt gi us stan vor lif unde sunt
und vristen user junges leven
ja truwn sprak simon van utrecht
gevet iu gefangen al up een recht
und latet iu nicht vordreten
hebbet gi dem kopman neen leid gedan
des moget gi wol geneten
und do se up de elve quamen
vel gudes se dar nicht vornamen
se segen de hövede steken
gi heren dat sint use mitgesellen
so sprak sik störtebeker
se worden to hamborch in de hechte gebracht
se saten dar nicht lenger dan eine nacht
al to densulvigen stunden
er dod ward also seer beklacht
van vrouwen und jungvrouwen
gi heren van hamborch een klene bitt
de wilt gi us vorseggen nicht
de kan iu nicht bringen grot quade
dat wi mogen den trurenbarch upgan
in usem besten gewade
de heren van hamborch deden en de eer
se leten en pipen und trummeln vorgeen
se hedden is lever entboren
weren se nu in der heidenschop gewest
se hedden dat wol gekoren
de henker de heet sik rosenvelt
he howde so mennigen stolten helt
mit gar so friskem mode
he stund in sinen gesnorten schoen
bet to den enkeln im blode
hamborch des gev ick di den pris
de rövers warden is nu ok wis
um di so mosten se starven
des machstu van golt ene krone dregen
den pris heffstu erworven
50402
stortebeker unde godeke micheel
de roveden beide to gliken deel
to water unde to lande
bet dat et gott in de hemel verdrott
dar moßten se liden grote schande
stortebeker sprok all to hand
de westersee is uns woll bekannt
darhen dar wöllen wi fahren
de riken koplüd van hamborg tohop
mögt jem ehr scheep nu wahren
nu lepen se as dull darhin
in ehren bösen rowersinn
bet man jem kreeg tofaten
bi hilligland in alle fröh
dar mussen set haar wull laten
de bunte koh ut flandern quam
dat rowerschipp up de hören nam
un stört et wiss in stücken
dat volk se brochen na hamborg hen
dar mussen sen kopp all missen
de vrone de heet sik rosenfeld
haut af so mennig stolten held
dat höwt mit kolen mote
he stund mit sine snörte schoh
bet an de enkels int blote